WILAYA YA MISSENYI YAPOKEA SETI ZA VITI NA MEZA 100 KUTOKA BENKI YA MAENDELEO TIB

Posted on: February 9th, 2021

Halmashauri ya wilaya ya Missenyi leo imepokea msaada wa seti 100 za viti na meza kwa ajili ya shule za sekondari wilayani hapa. Akisoma taarifa ya Hali ya Elimu  Wilayani hapa wakati wa hafla ya mapokezi wa samani hizo; Afisa elimu Sekondari Wilaya ya Missenyi  Bi Saverina Misinde amenukuliwa akisema kuwa Halmashauri ilituma maombi kwa wafadhili mbalimbali kuomba msaada wa vifaa vya ujenzi na Viti na Meza na Tanzania Investment Bank (TIB)  ni moja ya wafadhili waliotumiwa maombi na wametoa Seti 100 za Viti na Meza zenye thamani ya Tsh. 6,500,000.00.

 Akikabidhi msaada huo, Meneja wa Benki ya TIB Kanda ya ziwa Bw. Emmanuel Bushiri amekiri kupokea maombi ya msaada wa viti na meza kutoka Halmashauri ya Missenyi na kuamua kuwaunga mkono kwa seti 100 za viti na meza ili kutatua tatizo la vifaa hivyo. “Tunaamini msaada huu utachangia malengo ya Serikali ya kuendelea kuboresha elimu inayotolewa ili iweze kutoa maarifa na ujuzi wa kutosha kwa wahitimu wote” Alisema Bwana Bushiri.

Akitoa tahmini ya hali ya upungufu wa viti na meza katika shule za sekondari wilayani hapa, Bi Misinde amesema, awali upungufu wa seti za viti na meza ulikua seti 846 na Halmashauri ilitoa kiasi cha Tsh milioni 20 kwa ajili ya kutengeneza seti 400 za viti na meza.

Akitoa salamu za shukrani, Mwenyekiti wa Halmashauri ya Wilaya ya Missenyi Mh. Projestus Tegamaisho ameishukuru Benk ya TIB kwa mchango huo huku akiwataka wadau wengine wa maendeleo kuiga mfano huo. “Tunawashukuruni wafadhili wetu kutoka Benki ya Maendeleo ya TIB kwa msaada wa viti na meza, fikira yenu ya kuleta madawati ni fikra sahihi kwani uhitaji ni mkubwa kutokana na ongezeko la wanafunzi…Mh. Mkuu wa mkoa tunaomba uendelee kutupigia debe ili tuendelee kupata zaidi”  alisema Tegamaisho.

Nae mgeni rasmi katika hafla ya kukabidhi msaada wa seti 100 za viti na meza, Mkuu wa Mkoa wa Kagera Brigedia Jenerali Marco Elisha Gaguti ameishukuru  Benki ya TIB nakutoa wito kwa walimu kutunza vizuri samani hizo ili zitumike kwa malengo yaliyokusudiwa.