WIKI YA KAGERA -UJUMBE KUTOKA AFRIKA MASHARIKI NA KATI

Posted on: August 15th, 2019

Wiki ya Uwekezaji Kagera imeanza rasmi mkoani Kagera Agosti 12, 2019 kwa Mabalozi kutoka nchi za ukanda wa Afrika mashariki na kati kueleza fursa zinazopatikana katika nchi walizotoka na namna gani wafanyabiashara wa Kagera na Kanda ya Ziwa wanaweza kuchangamkia fursa hizo.

Mabalozi hao waliwasilisha fursa mbalimbali kwa wafanyabiashara wa mkoa wa Kagera waliohudhuria kongamano kwa lengo la kuwaonyesha fursa zinazopatikana katika nchi walizopo. Mabalozi wa Tanzania kutoka katika nchi za Uganda, Rwanda, Burundi, Kenya pamoja na Jamhuri ya Kidemokrasia ya Kongo wamehuzuria kongamano.

Akiwasilisha fursa zinazopatikana Rwanda balozi wa Tanzania Nchini humo Inspekta Jenerali Mstaafu Ernest Mangu ameushauri Mkoa wa Kagera kujenga masoko ya mipakani ili kusogeza bidhaa mbalimbali zinazopatikana nchini kuyafikia masoko ya nchi jirani haraka tofauti na ilivyo sasa kwani wafanyabiashara kutoka nchi za nje wamekuwa wakiingia ndani na kujitafutia bidhaa wenyewe.

Katika hatua nyingine balozi wa Tanzania Nchini Kenya Dk. Pindi Chana alisema kuwa wafanyabiashara wa Kagera na Tanzania bado wanahitaji Elimu kubwa juu ya biashara za kimataifa huku akitilia mkazo matumizi ya teknolojia za mitandao katika biashara zao badala ya kubeba bidhaa na kwenda kutafuta soko.

Mhe. Dk. Aziz P. Mlima balozi wa Tanzania nchini Uganda amewataka wakulima na wafanyabiashara wa mkoa wa Kagera kulima zao la parachichi ambalo sasa lina soko kubwa nchi za nje kuliko kujikita kupanda miti ya mbao pekee.

Kaimu Balozi wa Tanzania nchini Burundi Dr. Edmund Kitokezi amewataka wafanya biashara nchini kutoiangalia Burundi kwa udogo wake kwani fursa za kibiashara zilizopo Burundi ni nyingi.

Naye Balozi wa Tanzania nchini Jamhuri ya Kidemokrasia ya Kongo Lt. Jen. (mst) Paul I. Mella amewashauri wafanya biashara wa Mkoa wa Kagera na Tanzania kwa ujumla kutumia ukubwa wa eneo na wingi wa watu nchini Kongo kama fursa ya pekee nchini humo. “nchi ya Kongo ina soko kubwa la biashara na si mkoa wa Kagera tu bali Kanda ya ziwa kutokana na ukubwa nchi  na wingi wa watu” alisema Lt. Mella.

Wakati huo huo Mwenyekiti wa Kongamano la wafanyabiashara ambae pia ni Mkuu wa Mkoa wa Kagera Brigedia Jenerali Marco E. Gaguti amewataka wafanayabiashara wa Kagera kuchangamkia fursa mbali mbali za biashara. “Hapa tunaongelea fursa ya kitaifa na si mkoa wa Kagera tu kwani kati ya nchi nane zinazopakana na Tanzania nchi nne zote zinapakana na Mkoa wa Kagera kwa hiyo mkoa huu ni kitovu cha uchumi wa Nchi za Afrika Mashariki na Kati nataka kuona hamasa ya wafanya biashara wetu hapa wakitumia fursa hiyo.” Alisistiza MKuu wa Mkoa Gaguti

Naye Naibu Katibu Mkuu Wizara ya Katiba na Sheria Bw. Amon Mpanju hakusita kutoa aliyo nayo kwa wafanya biashara wa mkoa wa kagera huku akiwataka wachangamkie fursa ya uongozi awamu ya tano chini ya Rais John Pombe Joseph Magufuri ambao ni rafiki kwa wawekezaji wa ndani na nje ya nchi. “Mkoa wa Kagera sasa ni wakati wake wa kuinuka kiuchumi katika Awamu hii ya Tano na uongozi wa Mkoa usiruhusu malumbano ya kiasiasa kukwamisha maendeleo pia usiruhusu wafanyabiashara wabinafsi kuhodhi biashara wao peke yao” alisisitiza Mh Mpanju.

Akitoa shukrani kwa mabalozi hao kuja katika kongamano Mbunge wa Bukoba Mjini Mh. Wilfred Lwakatare amesema mabalozi hao ni sawa tu wametoa cheki ya fedha iliyo wazi kwa wafanya biashara na wananchi kwa ujumla na kilichobaki ni wao tu (wafanya biashara) kuandika kiasi chochote cha fedha wanachohitaji.