Kilimo

HALMASHAURI ya Wilaya ya Missenyi ipo upande wa kaskazini mashariki wa Mkoa wa Kagera. Wilaya hii ipo kati ya Latitudo 1 o na 3 o kusini ya mstari wa Ikweta na kati ya Longitudo 30 o 45′ na 31 o 19′ mashariki ya mstari wa Greenwich.

Aidha, ipo mita 1,100 juu ya usawa wa bahari. Hali hiyo inafanya wilaya kuwa na misimu miwili ya mvua, yaani vuli ambayo huanza Septemba na kumalizika Desemba na masika ambayo huanza Machi na kufikia tamati Juni.

Kipindi cha Julai hadi mwanzoni mwa Septemba ni kiangazi. Kipupwe huanza Januari hadi Februari. Wilaya hiyo inapakana kwa upande wa mashariki na Ziwa Victoria na upande wa Kusini Wilaya ya Bukoba, magharibi ni Wilaya ya Karagwe na kaskazini ni nchi ya Uganda.

Wastani wa mvua kwa mwaka ni milimita 800 na 1,500 ambazo hufanya mimea kuwa na umbijani kwa mwaka mzima. Ipo mito mikubwa miwili ya Kagera na Ngono, wilaya inayo ardhi ya vilima na mabonde yenye mito na matingatinga hasa kuelekea Mto Kagera. 

Halmashauri ya Wilaya ya Missenyi ina ukubwa wa kilometa za mraba 2,708.75, eneo linalofaa kwa kilimo ni hekta 99,726 na zinazolimwa ni 58,840 sawa na asilimia 59 ya eneo linalofaa kwa kilimo.